༧སྐྱབས་མགོན་གོང་མའི་གསོལ་འདེབས།

རིག་སྟོང་འོད་གསལ་ཆོས་ཀྱི་ཀློང་ཡངས་སུ། ། 
འཁོར་འདས་དབང་བསྒྱུར་བླ་མ་རྡོ་རྗེ་འཆང་། །

མ་དག་འགྲོ་བའི་མགོན་དཔུང་ཉིད་བྱོན་པའི། །
རྐང་གཉིས་མུན་སེལ་སྒྲོན་མེར་གསོལ་བར་འདེབས། །
བརྩི་ཆེན་སྙིང་པོའི་གདམས་ངག་སྦྲང་ཆར་གྱིས། །
རླབས་ཆེན་ཐུགས་ཀྱི་རྒྱ་མཚོ་རབ་རྒྱས་ཏེ། །
གྲངས་མེད་གདུལ་བྱ་མ་ལུས་གདུང་བ་སེལ། །
མགོན་མཆོག་ཡིད་བཞིན་ནོར་བུར་གསོལ་བར་འདེབས། །

ཚད་མ་བཞི་ལྡན་སྙན་བརྒྱུད་ཚར་ཟེར་གྱིས། །
སློབ་འབངས་ཆུ་སྐྱེས་འདབ་སྟོང་ལེགས་རྒྱས་ནས། །
བརྒྱུད་གསུམ་ཟེའུ་འབྲུ་སྨིན་མཛད་ས་སྐྱ་པ། །
གོང་མ་ཉིན་བྱེད་དབང་པོར་གསོལ་བར་འདེབས། །

གང་གི་རིང་ལུགས་མཁའ་དབྱིངས་དྭངས་མ་ལས། །
མཛད་འཕྲིན་ཟླ་འོད་འཛམ་གླིང་ཁྱོན་ཀུན་འཕྲོས། །
བསྟན་འཛིན་རྒྱུ་སྐར་རློམ་རྣམས་མོག་པོར་གྱུར། །
སྐྱབས་མགོན་རི་བོང་འཛིན་པར་གསོལ་བར་འདེབས། །

སྲིད་ན་ཟུར་ཕུད་ལྔ་པ་ལས་གཞན་པའི། །
འབྱེད་ཆོས་བཙལ་ཀྱང་ཕྱག་ན་རལ་གྲི་ལས། །
དཔེར་ཟླ་རྙེད་པར་དཀའ་བའི་ས་སྐྱ་པ། །
འཇམ་མགོན་བླ་མའི་ཞབས་ལ་གསོལ་བར་འདེབས། །


བསྟན་པ་གངས་རི་མཛེས་པའི་རྒྱན་གཅིག་པུ། །
སེང་ཆེན་མན་ངག་གཡུ་རལ་འཕྱུར་བཞིན་དུ། །
ད་དུང་བསྟན་པ་དཔུང་གིས་ཉེར་བཏེགས་ནས། །
སྐུ་ཚེ་ཡུན་དུ་སྲིངས་པར་གསོལ་བར་འདེབས། །
ཞེས་སྐྱབས་མགོན་༧་གོང་མ་རྡོ་རྗེ་འཆང་གི་ཞལ་སྔ་ནས་གསེར་ཆོས་ཡིད་བཞིན་ནོར་བུ་ཅུང་ཟད་རོལ་བའི་བསྐལ་ལྡན་གྱི་ལས་འཕྲོ་ཅན། གངས་རི་ཀརྨ་ཆོས་ཀྱི་རྒྱལ་མཚན་གྱིས་ཕྱི་ལོ་༢༠༠༩་ཕྱི་ཟླ་༤་ཚེས་༡༩་དབྱིན་ལེན་གྱི་བྱང་ཕྱོགས་མར་ཆུན་སི་ཐིར་བྲིས་པར་འདིས་ཀྱང་དྲིན་ཆེན་བླ་མར་དགྱེས་པའི་རྒྱུར་གྱུར་ཅིག །